854,520 Sa Barangay Nagnanais Magkaroon Ng Skills Training Sa TESDA

Umabot na sa 854,520 indibidwal mula sa iba’t-ibang barangay sa bansa ang nagnanais na magkaroon ng skills training na ipinagkakaloob ng Technical Education and Skills Development Authority (TESDA) sa pamamagitan ng programang Barangay Kasanayan para sa Kabuhayan at Kapayapaan (BKKK) o Skills Mapping.

Ayon kay TESDA Director General, Secretary Guiling “Gene” Mamondiong, ang nasabing bilang ng aplikasyon ay nagmula sa 23,350 barangays na tumugon sa programa ng ahensiya na layuning makapagbigay ng skills training sa lahat ng barangay sa buong bansa partikular na sa mga malalayong lugar.

Napag-alaman na ang Pilipinas ay binubuo ng 42,036 barangay kung saan ay mahigit na sa kalahati ng mga ito ang tumutugon sa programa ng TESDA para sa skills mapping at inaasahan na sa 2018 ay lulubo pa ang bilang ng mga aplikasyon sa 200%.

Mula naman sa kabuuang bilang ng mga nagnanais na magkaroon ng skills training sa TESDA na nanggaling sa mga barangay sa buong bansa ay umabot na sa 515,457 sa mga ito ang naiproseso na para sa skills mapping.
“As we want to make sure that everybody who wants to have skills training is given the opportunity, we have adopted two other modes of scholarship availment to democratize access to TESDA’s program and services such as online application and walk-in application”, sabi pa ni Mamondiong.

Sa kasalukuyan ay umabot na sa 40,662 aplikante mula sa online ang naitala habang 62,363 naman ang mga walk-in applicants at inaasahan pa na patuloy ang pagtaas ng bilang na ito dahil na rin sa isinasagawang skills mapping.

Ang skills mapping ay isang paraan kung saan ay inaalam ng TESDA ang skills training na dapat na ipagkaloob sa mga residente ng isang barangay o lugar na siyang magagamit ng mga ito sa pagpapaunlad sa kanilang komunidad.